清蒸東星斑、南乳炒素菜、雪耳湯、鎮江醋茄汁炆豬軟骨撈烏冬(15-8-2011)

呢兩個週六﹐5B媽就happy啦﹐因為有得攻打四方城﹐

大戰20個回合﹗幾爽呀﹗

星期日就休息下啦﹐整D清淡D野食﹐因為開檯都係

叫pizza 食﹐食到我滯滯地。

清蒸東星班﹐呢條魚顏色好黑﹐係澳洲北部魚﹐因為黑﹐

出口去香港大陸就唔值錢﹐做左急凍斑﹐留番自食﹕

南乳炒素菜- 椰菜﹐豆腐﹐金針﹐雲耳

雪耳﹐雪梨﹐蓮子﹐百合﹐無花果﹐豬展﹐榣柱﹐

冬菇湯

學軒軒用鎮江醋﹐茄汁炆豬軟骨﹐用黎撈烏冬﹐

酸酸甜甜好味道﹐有D似薑醋﹐尤其食調味個舊薑﹐

下次考慮落埋雞蛋﹐就似多D添啦﹗我一路炆一路

撇油﹐撇左成半碗油呀﹗

呢碗係打包比香蕉人帶lunch架﹐佢箍牙﹐食唔到

豬軟骨﹐放左舊豬展﹐啖啖肉﹗

   

鷄批、胡椒香蔥牛肉餅、黑椒洋蔥煎羊架（11-8-2011)

!

Aug 11, 2011 1:52 PMPublicPageviews 71823

 

做過雞批﹐餡內醬汁漲到漏晒出黎﹐真可惜﹐今次落足心機﹐刻意將底部批皮加高至比蛋撻模高出一上次截﹐ 將凸出底皮用指尖和面皮好好的接實﹐醬汁完全無漏出﹐今次做o既餡料係咖哩薯仔洋蔥牛肉粒﹐香蕉人話餡料好正﹐但皮嫌太硬﹐鐘意貴佬酥皮﹐其實係自己無牙食﹗而5B爸卻鍾情呢個放幾日都還脆又油o既皮減。

原本食譜300g粉要200g牛油﹐真係嚇C呀﹐成舊牛油噤滯呀﹐所以我自己試下:

餡料﹕牛肉或雞肉約120g切粒(鹽糖豉油醃好)﹐薯仔一個切粒(用水拾1份鐘)﹐半個洋蔥切粒﹐咖哩粉一湯﹐蠔油一湯匙﹐黑胡椒少許﹐材料炒熟打輕芡汁﹐放涼。

皮料:

300g 粉 + 4大湯匙沙糖+1茶匙鹽﹐拌勻

兩片牛油(約30g)﹐溶透﹐加入50g粟米油﹐兩種油混埋

1隻大雞蛋(留少少做掃面皮

6 - 7 湯匙鮮奶

油和蛋放入粉內拌勻﹐用手好似玩泥沙噤平均鬆開﹐唔好一舊舊﹐

再慢慢加入鮮奶﹐約加 6 -7 湯匙就可以將粉猜埋一糰﹐成糰就得﹐唔洗出力猜﹐成糰後放一陣﹐就可分割﹐

我用大蛋撻模做﹐做到10隻﹐分成10粒大做底皮﹐10粒細(約大既一半)做面皮﹐壓圓壓薄﹐底皮要放入模後還凸出少少﹐面皮就略大個蛋撻模圓周﹐放入餡就底面皮用指尖埋實口﹐要埋得密實以防醬汁爆漏﹐焗爐預熱220C﹐面皮掃蛋液﹐用刀背界花﹐利刀界係唔靚架﹐入中間下一格焗至金黃就得﹐呢個批隔夜食用微波爐﹐叮20秒﹐一樣鬆脆。

前幾日做o既胡椒香蔥牛肉餅﹐香蕉人好鐘意食。

早前買的特價羊肉﹐最後10塊羊架﹐用左黑椒洋蔥拔蘭地來猛火煎至外脆內八成熟﹐嘩﹗ 超受歡迎﹗

南瓜布甸、糯米卷、臘鷄肶、羊腩煲、蒸小蛋糕（4-8-2011)

Aug 4, 2011 6:24 PMPublicPageviews 16325

香蕉人已經開始箍牙兩日﹐新潮透明牙箍真係令箍牙醜態永無番身機會﹐唔講你係見唔到個牙箍﹐而且係隨時剝隨時帶﹐清洗亦方便﹐但每次食野都要除﹐食完要擦牙再帶番﹐又幾麻煩架﹐但愛靚唔愛命﹐呢D都係小事嗟﹗

上星期食唔到固體食物﹐整左幾隻南瓜布甸﹐用蝦米蓉﹐冬菇蓉和A貨鵝肝醬﹐A貨鵝肝醬味道真係無得頂﹐唔講必定以為我落左成擔味精﹗

上週末本想包糯米雞﹐誰知一囉糯米出黎﹐有人又話想食糯米飯﹐就改一改﹐加油鹽蒸熟糯米﹐拌入炒香臘味粒﹐蝦米﹐冬菇和魷魚粒﹐加調味和蔥粒﹐就有得食啦。

但浸得太多糯米﹐吃不完就做了幾條糯米卷。

還有一條臘雞腿﹐經過風乾超過一個月﹐味道真係大大不同﹐好喜歡個種鹹香和乾身感覺﹐真真有臘o既風味﹐一定要番單﹗

還有羊腩未吃﹐上星期日就郁郁佢﹐滾滾下

昨晚整定蒸小蛋糕做早餐﹐今次加入朱古力味﹐都唔錯﹗

朱古力、咖啡奶凍、燉蛋、A貨鵝肝醬（29-7-2011)

愛靚唔愛命 + A貨鵝肝醬

Jul 29, 2011 2:11 AMPublicPageviews 28026

前日是香蕉人入院剝智慧齒的日子，剝智慧齒隨了因智慧齒不好外，還為了打後兩年半箍牙做好準備，另外多剝兩隻牙，好讓騰出位置來箍回不整齊的牙齒，共剝6隻牙.

其實箍牙此事早在十多年前，智慧齒一隻還未長出前便要做了，那時大姨甥女也要箍牙，二人往做orthodontist 的朋友處做，友情價, 可惜香蕉人臨陣退縮，不肯做，如今四隻智慧齒因不夠位長得不好，弄得前面的牙也壞了﹐要杜牙齦﹐早前做了﹐箍牙她選用invisible 的一種﹐不會有鋼牙的醜態﹐矯牙醫生朋友已退休﹐沒友情價﹐費用貴兩陪有多﹐加起今次入院剝牙和杜牙齦﹐唉﹐起碼要A$13000 - A$15000 埋單﹗她自25歲便需脫離父母的私人保險﹐自此又愛理不理﹐沒買﹐當然要我資助﹐今次荷包好傷﹗

前日約了下午2.30入院﹐前一晚吃過晚飯﹐午夜吃過點小食﹐就一直沒吃過東西﹐到晚上7.30還在醫院內﹐等醫生批她出院﹐男友買了雪糕給她吃﹐但剛剝完6隻牙﹐口中塞滿棉花﹐血和雪糕交融﹐可想而知吃不了幾口﹐到快9.00才回家﹐見她面如死灰﹐真是比白紙還要白﹗ 原來又月經﹗ 真是隨時暈低的模樣﹐當真嚇人。

本已煲了雞肉魚片粥給她﹐免強吞點粥水來吃止痛藥﹐還嫌粥內有點米蓉流落牙洞﹐只好馬上做些滑溜溜的食物。

家裡預備好frozen yogurt﹐cheese yogurt 和豆奶給她﹐就用來做了些奶凍﹕

一朱古力﹐一咖啡﹐一原味給她吃了,   又說不夠甜 !

天寒地凍又黎M﹐怎能全吃凍品﹐又來一個熱辣辣custard

加個豬潤水補補血

餓了一日﹐沖涼時還見頭暈﹐原本1.75M高,  重50kg,  剩48.5kg﹐真的似條瘦骨仙﹐想食薯蓉﹐用罐清雞湯煮綿薯仔﹐趁熱壓成蓉﹐加兩片芝士拌滑

薯蓉的gravy﹐有黑椒味﹐比KFC 的好吃

喝了一天豬潤水﹐在超市見雞肝很大很新鮮﹐A$4/kg﹐買了半kg﹐有6-7隻﹐用了三隻﹐加薑加洋蔥﹐滾幾滾便成很鮮味的清湯﹐隔起來煮薯蓉﹐剩下的雞肝還很鮮味﹐本想給5B﹐想牠們還未吃完前一晚的豬潤﹐不能多吃了﹐丟了又浪費﹐想起早前超市用雞肝做的假鵝肝醬﹐A$6 - A$7 一小丁方﹐一半還是湯汁做的o者哩糕﹐就動手試做﹐剪去粗筋﹐嘁去外皮﹐本想用攪拌機打蓉﹐可惜太夜了﹐怕太嘈﹐草草用飯殼壓成蓉﹐用煮雞肝的清湯開一點芡粉和魚膠粉﹐加入一湯匙拔蘭地酒﹐胡椒粉﹐鹽﹐煮至滑﹐和雞肝蓉拌合﹐一試味﹐嘩﹐不得了﹐比味精還濃﹐放雪櫃冷凍﹐就成了這個A貨鵝乾醬。

今早用來搽麵包﹐很好吃﹐只是質地粗一點﹐如用攪拌機打滑﹐我想一定會無得頂

還可以切小片﹐入口即溶

A$1 成本﹐就一大碗了﹐我想份量有超市的小丁方的幾倍﹗平常很少吃內臟的我﹐間中吃也無防﹗想真正的鵝肝醬是用很多牛油來凝固的﹐我用芡粉和魚膠粉﹐健康一點吧﹗ 有番單﹗下次要用攪拌機!

香蔥烏冬 + 雞批 (26-7-2011)

香蔥烏冬 + 雞批

Jul 26, 2011 1:21 PMPublicPageviews 43920

上個週末學網友flora﹐用蔥黎做麵﹐我矇查查﹐唔記得拖水﹐求其用攪拌機打爛兩大條鬼佬蔥﹐D蔥貴到屎屎下﹗A$1.30一扎得個五六條﹐唔捨得隔走D渣﹐倒晒落去同D粉一齊﹐又想佢煙韌D﹐試下溝4湯匙糯米粉﹐500g麵粉﹐240ml水打蔥﹐一隻雞蛋﹐用麵包機攪一陣﹐成糰就自己用棍桿平﹐因為想佢粗D做烏冬﹐壓麵機最厚個厚度都太薄﹐無用壓麵機﹐就用手桿厚D啦﹐效果唔錯喎﹐麵條比較滑和柔韌﹐炒起黎完全見唔到蔥渣﹐下次有番單﹕

　

桿平後見到絲絲香蔥

切條後用乾粉爽一爽切邊﹐輕輕用手指滾轉一下﹐麵條就圓圓的像烏冬麵了﹐做好略等1小時﹐待麵條發一發才煮。

滾水下鹽油﹐煮熟完全不見蔥絲﹐過冷河﹐再炒起來賣相都唔錯﹐口感好正﹗完全唔覺蔥個陣味﹗

上次做過蘋果批﹐今次做細細隻雞批﹐用醃好雞腿肉﹐洋蔥﹐鮮奶+麵粉和黑白胡椒粒做個芡﹐做了個好creamy餡料﹐用蛋撻模做﹐可惜皮邊做得唔夠密實﹐焗到最後幾分鐘時﹐部份餡汁滾出﹐creamy 的胡椒汁幾乎流晒出模底。

本來可以外脆內creamy 的﹐家陣餡料乾左好多﹐但都唔錯﹐用微波爐番叮熱皮一樣鬆化﹐有番單﹐下次個皮邊埋口要密實D﹗

花園的馬蹄蘭愈來愈多﹐剪D落黎放屋內插。

窩貼+ 蘋果批 (25-7-2011)

窩貼+ 蘋果批

Jul 25, 2011 2:27 PMPublicPageviews 96819

 

近日5B媽做o左太上皇﹐晚飯多由5B爸操刀﹐不用費神﹐雖然無美酒佳餚﹐簡簡單單菜軟牛肉﹐薯仔炆雞翼之類﹐但5B媽要求不高﹐不用動手有得吃已非常感恩了﹗

怕手生銹晚飯後便動手做定早點﹐做了孟老師的窩貼﹐香蕉女要帶番工做午餐﹐餡料是牛肉﹐乾蔥﹐椰菜和蔥.

餡料:

碎豬肉或牛肉，加水，糖、鹽、豉油、蠔油、胡椒粉、麻油、生粉，用三隻筷子(或用手最好)攪至起膠，再加入碎乾葱頭、碎椰菜、蔥粒，攪至滑溜溜.

皮料:

250g中筋粉放不銹鋼盤﹐，先落50ml滾水，用膠飯壳略撈勻，放不銹鋼盤﹐盡量將燙熟麵粉平均分散於麵粉中﹐再落100ml冷水，再撈勻，用手輕搓至成糰，取出粉糰輕揉至光滑，完全唔洗出力搓，用保鮮紙包好等20分鐘，將粉糰平均分割，一分二，二又分四，四又分八，成八等份，每一份又分成三等份，就成24份，每份輕輕初成圓粒，用手在枱上按扁，就可以用棍桿薄成圓塊，馬上包上餡料，就粒粒大小平均，呢個食譜個皮好柔軟，好好包.

煎時預熱易潔鑊﹐中火﹐先落油輕輕煎半分鐘，下一碗水(煎8 - 12隻)，蓋好，待至水乾，開蓋，再略煎至底皮脆，就上碟啦！

小心得：

- 桿平後最好即包入餡料，以免粉皮過乾，不好埋口。

- 包好要分開放，太近會痴埋，下面墊蛋糕紙，洒D乾粒，如放雪柜唔好用保鮮紙封實，會出水，用索油紙蓋住好。

- 餡要包得飽滿企身，煎起嚟就靚仔。

- 同樣粉皮餡料，可做成細隻餃子，粉皮足夠做成36隻， 烚熟便可上碟 

- 快手包法：http://www.youtube.com/watch?v=9QtfaCSAIZA

- 碎肉曾經用過豬肉﹐牛肉﹐雞腿肉﹐袋鼠肉﹐火雞肉來做﹐以豬肉黏性最好﹐最能起膠包裹住其他菜料﹐不至鬆散﹐又以火雞肉最鮮﹐可惜不是隨處買得到﹐價錢亦貴。

- 我唔似D師傅噤叻﹐一手囉皮﹐一手去摺﹐我個論盡包窩貼方法係桿平塊皮﹐就由得佢係檯面﹐馬上鋪上餡料﹐餡料堆放則於一邊(我貪心﹐大大舊料)﹐兩隻手一齊係另一邊如摺扇般快手摺幾個小摺﹐輕按實﹐噤摺痕下面就成一個小窩﹐再同另一邊無摺既接合﹐才囉起成隻窩貼在手﹐用手指沿邊按實埋口﹐再將餡料推一推過小窩﹐令小窩飽滿﹐平放窩貼在盤上時﹐順手略整型至企身﹐掘一掘成小灣月型﹐窩貼多放一陣就乾D﹐型狀就保持﹐放冰格急凍做存貨都得架。

做了24隻﹐一個早上便售罄﹗

朋友送來很多蘋果﹐有紅有青﹐青的是甜中帶點酸的golden delicious﹐水份較少﹐用來做蘋果批最合適﹐焗軟後變甜﹐皮是曲奇蛋撻皮﹐1/3牛油﹐2/3粟米油﹐做了一個餡料沒加糖兩老吃﹐一個加了2湯匙糖﹐但香蕉女還是嫌不夠甜﹗

這個皮不錯﹐隔夜番叮也一樣脆﹗

黑芝蔴曼頭(19-7-2011)

黄疳疳的麵粉

Jul 19, 2011 1:01 AMPublicPageviews 37822

係澳洲呢邊無論用乜牌子麵粉，就算明明寫住white flour,  又無寫未經漂白unbleached, 無論用乜方法，有人教加白醋落水蒸，有人教用鮮奶加白沙糖搓麵糰，蒸出來的中式包點都係黃疳疳架！

今晚跟孟老師整黑芝麻饅頭，改了一半水一半鮮奶，食譜份量是500g粉做8隻，點知蒸出嚟真係嚇親，隻隻都超巨型！